TN Engineering Course Cut off Mark Details in Tamil | இன்ஜினியரிங் படிப்பு கட் ஆப் மதிப்பெண் குறைய வாய்ப்பு?

TN Engineering Course Cut off Mark Details in Tamil | இன்ஜினியரிங் படிப்பு கட் ஆப் மதிப்பெண் குறைய வாய்ப்பு?

TN Engineering Course Cut off Mark Details in Tamil

பிளஸ் 2 தேர்வில் கணிதத்தில் 690 மாணவர்கள் மட்டுமே 100-க்கு 100 மதிப்பெண் பெற்றிருப்பதால் பொறியியல் படிப்புகளில் சேருவதற்கான கட்-ஆஃப் மதிப்பெண் குறையும் என எதிர்பார்க்கப்படுகிறது.

தமிழகத்தில் பிளஸ் 2 பொதுத் தேர்வு முடிவுகள் கடந்த திங்கள்கிழமை வெளியானது. இதில் தேர்வெழுதிய 94 சதவீத மாணவ, மாணவிகள் தேர்ச்சி பெற்றனர். கணித பாடத்தில் 690 பேர் மட்டும் 100-க்கு 100 மதிப்பெண்கள் பெற்றுள்ளனர். இது கடந்த ஆண்டுடன் ஒப்பிடுகையில் மிகவும் குறைவாகும்.

கடந்த ஆண்டில் 1,858 பேர் கணிதத்தில் 100-க்கு 100 மதிப்பெண்கள் பெற்றிருந்த நிலையில், இந்த ஆண்டு சுமார் 3 பங்கு குறைந்துள்ளது. ஆனால், கடந்த ஆண்டைவிட இந்த ஆண்டு வேதியியல், இயற்பியல் போன்ற முக்கிய பாடங்களில் 100-க்கு 100 மதிப்பெண்கள் பெற்றவர்களின் எண்ணிக்கை அதிகமாக உள்ளது.

Read Also: பொறியியல் படிப்புக்கு எப்படி கட் ஆப் மதிப்பெண்கள் கணக்கிடுவது

வேதியியல் பாடத்தை பொருத்தவரை கடந்த ஆண்டு 1,500 மாணவர்கள் மட்டுமே 100-க்கு 100 மதிப்பெண்கள் பெற்றிருந்த நிலையில், இந்த ஆண்டு 3,909 பேர் பெற்றுள்ளனர். இதேபோல இயற்பியல் பாடத்தில் கடந்த ஆண்டு 100-க்கு 100 மதிப்பெண் பெற்றவர்களின் எண்ணிக்கை 634-ஆக இருந்த நிலை யில் இந்த ஆண்டு அது 812-ஆக உயர்ந்துள்ளது. இந்த ஆண்டு உயிரியலில் 1,494 பேரும், தாவரவியலில் 340 பேரும், விலங்கியலில் 154 பேரும், கணித அறிவியலில் 4,618 பேரும் 100-க்கு 100 மதிப்பெண்கள் பெற்றுள்ளனர்.

கணினி அறிவியல் பாடத்தில் கடந்த ஆண்டு 3,827 பேர் சென்டம்' பெற்றிருந்தனர். அது இந்த ஆண்டு 4,618-ஆக உயர்ந்துள்ளது. மொத்தத்தில் கடந்த ஆண்டுடன் ஒப்பிடுகையில் இந்த ஆண்டு 8,544 மாணவ-மாணவிகள் 100-க்கு 100 மதிப்பெண்கள் எடுத்து சாதனை படைத்துள்ளனர்.

பிளஸ் 2 தேர்வில் கணித அறிவியல், இயற்பியல், வேதியியல் பாடங்களில் பெற்ற மதிப்பெண்கள் 200 மதிப்பெண்ணாகக் குறைக்கப்பட்டு (கணிதம் 100, வேதியியல்- இயற்பியல் தலா 50 என 100 மதிப் பெண்) அடிப்படையில் பொறியியல் தர வரிசை பட்டியல் தயாரிக்கப்படும்.

இந்த ஆண்டு கணித பாடத்தில் 100-க்கு 100 மதிப்பெண் பெற்றவர்கள் எண்ணிக்கை குறைந்தாலும் கூட வேதியியல் பாடத்தில் கடந்த ஆண்டைவிட நிகழாண்டில் 2 மடங்கு பேர் கூடுதலாக முழு மதிப்பெண்கள் பெற்றுள்ளனர்.

பொறியியல் தரவரிசை பட்டியலைப் பொருத்தவரை இயற்பியல், வேதியியலைவிட 2 மடங்கு கூடுதல் முக்கியத்துவம் கணித பாடத்துக்கு கொடுக்கப்படுகிறது. எனவே, பொறியியல் கட்-ஆஃப் மதிப்பெண் சற்று குறைய வாய்ப்பிருப்பதாக கல்வியாளர்கள் தெரிவித்தனர்